بتشتكي من فواتير الكهرباء العالية في فصل الصيف بسبب التكييف؟ انا عندي الحل - Yellow عالم من الاخبار في كل المجالات
نصائح للمرأة والمنزل

بتشتكي من فواتير الكهرباء العالية في فصل الصيف بسبب التكييف؟ انا عندي الحل

بتشتكي من فواتير الكهرباء العالية في فصل الصيف بسبب التكييف؟ انا عندي الحل اللي هيوفر عليك كتير .

كتير منا بتحصله حالة من الذهول لما بيشوف فاتورة الكهرباء خصوصا خلال فصل الصيف وده طبعا بسبب ارتفاع درجات الحرارة لدرجات أعلى من الطبيعة بتاعها في السنوات السابقة بسبب تغيرات المناخ المستمرة اللي أثرت على درجات الحرارة صيفا وشتاء.
تغيير المناخ وارتفاع دراجات الحرارة في الصيف خصوصا شهري يوليو و أغسطس اللي بنلاحظ خلالهم أعلى درجات الحرارة في العام بالكامل بيجبرنا على تشغيل التكييف لفترات طويلة على مدار اليوم.
وده بيكون السبب الأساسي في ارتفاع فاتورة الكهرباء لانك غصب عنك بتدخل في شريحة كبيرة من المحاسبة مكونتش بتوصل ليها خلال فصل الشتاء وباقي فصول السنة.
ازاي بقى تقدر تحافظ على معدل زيادة فاتورة الكهرباء وفي نفس الوقت تستخدم التكييف بشكل مثالي.
اولا لازم تعرف نقطة مهمة جدا تخص استخدام التكييف عموما.
لما حضرتك بتظبط درجة الحرارة بتاعت التكييف على درجة حرارة ٢٢ مثلا ده مش معناه أن التكييف هيخرج درجة الحرارة دي من وحدة التوزيع.
درجة حرارة الهواء الخارج من وحدة التوزيع بيكون أقل درجة حرارة بتقدر وحدة التبريد بالتكييف (الكومبروسر) تخرجها عشان تبريد المكان المتواجد فيه التكييف ودي بتتوقف على مدة كفائة وحدة التبريد وشحن الفريون بالجهاز ممكن توصل ل ١٠ درجات أو أقل احيانا.
اومال ايه ٢٢ درجة دي اللي انا ظابطها على الريموت؟؟
دي الدرجة اللي لما سينسور الحرارة بجهاز التكييف يحسها في الغرفة اللي حضرتك حاطت التكييف فيها هيفصل وحدة التبريد (الكومبروسر) ويشتغل مروحة وتوزيع هواء فقط.
واول لما سينسور الحرارة هيحس إن درجة حرارة الغرفة زادت عن الدرجة المطلوبة هيبداء يدي إشارة لوحدة التبريد بالعمل مرة أخرى.
طيب نطلع من كدة بأيه؟؟
إن وحدة التبريد بتفضل شغالة لحد تحقيق درجة الحرارة المطلوبة سواء كانت ٢٦ أو ١٦ درجة.
وطبعا كلما قلت درجة الحرارة المطلوبة زادت مدة التشغيل للوصول للدرجة المطلوب تحقيقها وكمان زاد الاستهلاك في الكهرباء وبالتالي زادت فاتورة الكهرباء الشهرية.
طيب ازاي اقلل استهلاك التكييف الشهري؟
١- اختيار التكييف المناسب لكل مكان حسب المساحة يعني غرفة في حدود ٣٤ م مع حساب محتويات الغرفة ممكن تكييف بقدرة ١.٥ حصان هيكون مناسب جدا انما غرفة بمساحة ٤٥ م لا يمكن أبدا تركيب جهاز بقدرة ١.٥ حصان ولكن تحتاج على الأقل تكييف بقوة ٢.٢٥ حصان لتحقيق درجة الحرارة المطلوبة في اقل وقت وأقل مجهود على التكييف نفسه.
٢- ظبط درجة الحرارة على درجة حرارة غير منخفضة جدا لان ظبط درجة حرارة التكييف على درجة حرارة قليلة زي ١٦ أو ١٨ درجة هيزود مدة شغل وحدة التبريد اللي هي اكتر جزء بيستهلك الكهرباء وكمان هيضعف قوتها مع الوقت.
افضل درجة حرارة ممكن تكون مناسبة لظبط التكييف هي بين ٢٤ -٢٦ درجة مئوية ده مستوى هيحافظ على عمر التكييف وكمان يقلل فترة تشغيل وحدة التبريد بالجهاز عشان تحقق درجة الحرارة المطلوبة والأهم هيقلل استهلاك الكهرباء ويقلل بالتالي فاتورة الكهرباء.
٣- لو لسة بنشتري تكييف جديد يبقى الافضل انك تختار تكييف فيه انفيرتر لان الانفيرتر بيقلل من استهلاك الكهرباء بنسبة حوالي ٤٠٪ وده رقم كبير هتحس بيه في الفاتورة.
ولو الإمكانيات لا تسمح لشراء تكييف بالانفرتر أو انك عندك تكييف حاليا مش متوفر فيه inverter يبقى النقطتين ١ و ٢ كافيلين أنهم يخفضوا الفاتورة بنسبة كبيرة أن شاء الله.

المحافظة على درجة حرارة التكييف ٢٥ درجة مثلا هيساعدك على حاجات كتير :
اولا هيحافظ على صحتك من تغيير درجة الحرارة المفاجئ من غرفة بها تكييف لغرفة ليس بها تكييف والعكس.
ثانيا درجة الحرارة ٢٥ درجة بالمقارنة بدرجة الحرارة في الشارع في أيام الصيف هي أقل من درجة حرارة الجو بحوالي ١٥ درجة وده جو حلو ومناسب جدا.
انا شخصيا لما جربت الطريقة دي فاتورة الكهرباء زادت بس حوالي ١٢٠ جنيه تقريبا عن الفاتورة المعتادة في غير فصل الصيف مع العلم أن التشغيل لتكييف واحد بمعدل حوالي ٨ ساعات يوميا وهو بقوة ١.٥ حصان في غرفة نوم بمساحة ٣.٥*٤م تحتوي على دولاب كبير و سرير كبير و تسريحة وبعض الكراسي وقطع الأثاث الصغيرة.
الخلاصة : استخدامك للتكييف خلال فصل الصيف بعقل وحكمة في حدود درجة حرارة ٢٥ درجة هيساعدك في تقليل استهلاك الكهرباء وكمان بيزود عمر الجهاز.

 

موقع Yellow ينشر اخبار ومقالات أصلية تساعدك في كيفية تعلم مهارات جديدة من خلال الصور واخبار حول التكنولوجيا والألعاب والترفيه والتسلية اخبار الصحة والجمال وصفات الأبراج وحظك اليوم ومعاني الاسامي وأخر التريندات  وكمان تقدر تتابع اخبار الفن والمشاهير.
اشترك في جروب Yellow على التليجرام عشان توصلك اخر الاخبار
https://t.me/+Kg1MYd5hqjQ3YTA0

What's your reaction?

Related Posts

1 of 27